Stressandi afmælisdagur fyrir Viktoríu Svíaprinsessu

Viktoría Svíaprinsessa verður þrítug á morgun en afmælisdagurinn verður ekki mjög afslappandi. Stíf hátíðardagskrá henni til heiðurs bíður hennar og afmælinu verður fagnað bæði í Öland og í konungshöllinni í Stokkhólmi. Þetta er í annað sinn sem afmælisdagur Viktoríu er haldin formlega hátíðlegur en fyrra skiptið var þegar hún varð 18 ára.

Að lokinni guðþjónustu í konunglegu kapellunni klukkan ellefu fyrir hádegi, tekur hún á móti fulltrúa sænska þingsins og sænsku ríkisstjórnarinnar sem ganga á fund prinsessunnar og óska henni til hamingju með daginn.

Á hádegi verður skotið fallbyssuskotum til heiðurs afmælisbarninu. Síðan fær hún kveðju frá sænska hernum en fulltrúar hans standa heiðursvörð fyrir hana innan múra konungshallarinnar. Síðan fá fjölmiðlar að taka viðtal við hana. Að þessu loknu flýgur prinsessan til eyjarinnar Öland þar sem taka við meira eða minna hefðbundin hátíðarhöld í tilefni afmælis hennar. Konungsfjölskyldan snæðir þar hádegisverð og um klukkan fjögur tekur krónprinsessan við hamingjuóskum frá almenningi við sumarsetur konungsfjölskyldunnar Solliden á Ölandi. Þegar það er búið verða haldnir tónleikar henni til heiðurs á Borgholms íþróttasvæðinu. Að þeim loknum tekur konungsfjölskyldan til matar síns á sumarsetri sínu.

Eftir því sem sænska blaðið Dagens Nyheter greinir frá er þó engin beygur í prinsessunni, enda búin að vera í sviðsljósinu í þrjátíu ár og tekur hinum þéttskipaða afmælisdegi með stakri ró.

• 1 blogg um fréttina

Bloggað um fréttina

• TómasHa: Ég og viktoría