Landaði 8 punda bleikju á blankskónum

Kristján Þór Júlíusson, alþingismaður og fyrrverandi bæjarstjóri á Akureyri, krækti í 8 punda bleikju á þriðja svæði í Eyjafjarðará í kvöld. Hann átti ekki annarra kosta völ en að fela syni sínum að landa fiskinum.

Kristján fékk að taka nokkur köst þegar hann heimsótti son sinn og vini við veiði í Eyjarfjarðará. Hann var því hér um bil á blankskónum, að því er kemur fram á veiðivefnum flugur.is.

„Heljarmikil kusa tók Pheasant Tail og straujaði út svo kvein í hjólinu, hún fór með allt niður á undirlínu,“ segir á vefnum. Sonur Kristjáns, varð að koma til bjargar þar sem skóbúnaður alþingismannsins var ekki ætlaður til stórræðanna í veiðiskap og tókst honum að landa fiskinum eftir um 20 mínútna baráttu.

Fiskurinn var nákvæmlega 4 kíló og 68 sm, gullfallegur sem sjá má á meðfylgjandi mynd. Ekki er vitað til þess að stærri fiskur hafi komið úr ánni í sumar.

• 1 blogg um fréttina

Bloggað um fréttina

• Stefán Jón Hafstein: Mbl þarf að læra að geta heimilda