Biðin á enda

Sala á nýjustu Harry Potter bókinni hófst klukkan 23:01 í kvöld á Íslandi. Margir hafa beðið í óþreyju eftir sjöundu og um leið síðustu bókinni um galdrastrákinn. Einhverjir aðdáendur bókanna mættu fyrir utan bókaverslanir í gær til þess að verða fyrstir til þess að hljóta hnossið á Íslandi. En íslenskir aðdáendur Harry Potter eru ekki einir um að hafa beðið útgáfu bókarinnar því víðsvegar í heiminum mynduðust biðraðir fyrir utan bókaverslanir þar sem hennar var beðið með eftirvæntingu. En nú er biðin loks á enda og eflaust margir sem eiga eftir að vaka í alla nótt við lesturinn.

Bókin, sem nefnist Harry Potter and the Deathly Hallows, kom einungis út á ensku í kvöld þar sem þýðendur fá bókina ekki í hendur á undan öðrum lesendum. Bókin kemur út á íslensku í nóvember en bókaútgáfan Bjartur gefur út bækurnar um Harry Potter á íslensku.

Potter-áhugamenn hafa mikið velt því fyrir sér undanfarna mánuði hvort Potter láti lífið í bókinni, en höfundur bókanna, JK Rowling, hefur gefið upp að tvær sögupersónur láti lífið. Það má því búast við líflegum umræðum á Netinu í nótt um hvort Harry Potter lifir af eður ei.