Harry Potter rokselst um allan heim

Sjöunda og síðasta bókin um Harry Potter hefur rokselst um allan heim í dag, enda hafa margir aðdáendur galdrastráksins beðið óþreyjufullir eftir að komast að því hver verði örlög Potters og félaga hans í Hogwarts skólanum.

Allt útlit er fyrir að Harry Potter and the Deathly Hallows, eftir J.K. Rowling, muni slá hraðamet í sölu, ef marka má fyrstu sölutölur. Markaðssetningin hefur verið skipulögð í þaula og allt hefur verið gert til þess að skapa sem mesta spennu. Síðasta bókin á því eftir að seljast í bílförmum líkt og þær fyrri.

Fréttir af því að söguþráðurinn hafi lekið á netið auk fullítarlegra blaðagreina um bókina, að sumra mati, virðast ekki hafa dregið úr áhuga fólks á nýjustu bókinni. Þúsundir manns, jafnt ungir sem aldnir, hafa safnast saman í bókaverslunum í þeim tilgangi að nálgast eintak. Margir hafa klætt sig í búninga sem persónur úr bókunum.

Hér gefur að líta stafla af nýjustu Harry Potter bókinni í bókaverslun í Pakistan. AP

• 1 blogg um fréttina

Bloggað um fréttina

• Kristín M. Jóhannsdóttir: Ævintýri næturinnar