Kryddpíurnar bæta við tónleikum

Kryddpíurnar hafa bætt þrennum nýjum tónleikum við tónleikaferðalag sitt. Er þetta gert vegna mikillar eftirspurnar eftir miðum. Kryddpíurnar, Victoria Beckham, Mel B, Emma Bunton, Mel C og Geri Halliwell, greindu frá því í lok júní að þær ætluðu í tónleikaferð um heiminn en það er fyrsta tónleikaferð þeirra frá því að þær hættu samstarfi árið 2001.

Á vef þeirra kemur fram að þrjár milljónir manna hafi óskað eftir því að kaupa miða á tónleika þeirra.

Kryddpíurnar munu bæta við tónleikum í Vancouver, San Jose og Shanghæ. Áður höfðu þær ákveðið að halda tónleika í Lundúnum, Las Vegas, Los Angeles, New York, Köln, Madríd, Hong Kong, Sydney, Höfðaborg og Buenos Aires.

Í tengslum við tónleikana munu þær gefa út safndisk með tónlist frá frægðardögum sínum. Kemur diskurinn út í desember, sjö árum eftir að síðasta hljómplata þeirra kom út.

• 1 blogg um fréttina

Bloggað um fréttina

• Daníel Pétur Daníelsson: Er tilgangur lífsins að fara á Spice girls tónleika?