Myndskeið frumsýnt

Leitun er að eftirminnilegri tónleikaför íslenskrar hljómsveitar en þeirri sem Sigur Rós fór í um sveitir landsins í fyrrasumar. Nú er von á kvikmynd um ferðalagið og verður fyrsta sýnishornið úr myndinni frumsýnt á mánudaginn, bæði á vefsíðu breska tónlistartímaritsins NME (nme.com) sem og á mbl.is.

Einnig ber til tíðinda að tónlist sveitarinnar heyrist í stuttmynd Andrew McPhillips, "Blood Will Tell," sem fjallar um stökkbreyttar moskítóflugur sem herja á hollenskan smábæ á sextándu öld. Stuttmyndin verður sýnd á kvikmyndahátíðinni í Toronto en enn á þó eftir að ganga endanlega frá svokölluðum "festival rights" fyrir notkun tónlistarinnar í myndinni en um slíkt þarf að semja sérstaklega.