Travolta viðkvæmur fyrir sól

John Travolta lætur bera fyrir sig sérútbúna sólhlíf svo að geislar sunnu fái ekki sleikt húð hans.

Stórstirnið vinnur nú að gerð myndarinnar Gömlu brýnin (Old Dogs), en í henni leikur hann aðalhlutverk ásamt Robin Williams. Stóðu tökur nýlega yfir við pylsustand nokkurn, og var sérstakur drengur fenginn til að skýla gömlu dansstjörnunni fyrir sólinni. Fór vel á með hlífðardreng og Travolta, en Robin fagnaði hins vegar sjóðandi sólinni, og gleypti geisla hennar áfergjulega.

Myndin sem þeir félagar leika saman í fjallar annars um tvo vinnu- og bissnessfélaga sem komast í hann krappan þegar undarleg atburðarás verður til þess að sjö ára tvíburar koma róti á líf þeirra. Stendur til að frumsýna verkið á næsta ári.