Bandarísk hóteldrottning látin

Bandaríska hóteldrottningin Leona Helmsley er látin, 87 ára að aldri. Helmsley vakti mikla athygli á ofanverðri síðustu öld þegar hún var dæmd til fangelsisvistar fyrir að komast undan því að greiða skatta. Hún var einnig staðin að því að láta starfsfólk hótela sinna vinna hluta af þegnskylduvinnu, sem henni var gert að inna af hendi í tengslum við reynslulausn.

Helmsley og Harry, eiginmaður hennar, ráku um tíma mikið fasteigna- og hótelveldi. Réttarhöldin yfir Helmsley vöktu mikla athygli um allan heim á sínum tíma en m.a. báru starfsmenn hennar vitni og sögðu að hún stýrði fyrirtækjum sínum og heimili með harðri hendi.

Einn fyrrum starfsmaður sagðist hafa heyrt Helmsley segja: „Við borgum ekki skatta. Það er bara litli maðurinn, sem borgar skatta."

Helmsley harðneitaði að hafa látið þessi orð falla en ummælin fylgdu henni samt það sem hún átti eftir ólifað.

• 1 blogg um fréttina

Bloggað um fréttina

• Billi bilaði: Þetta er skattastefna USA