Drap FBI feril Stevens Seagals?

Jötunmennið Steven Seagal kennir FBI um fæð þeirra kvikmyndahandrita sem hann fær í hendur sínar.

Leikarinn, sem er þekktur fyrir vinsælar, testósterónhlaðnar slagsmálamyndir á borð Under Siege og Out for Justice, hefur nú í fyrsta skipti tjáð sig opinberlega um fimm ára rannsókn þar sem kappinn er bendlaður við ógnanir og hótanir í garð blaðamanna.

Steven sagði Los Angeles Times: "Falskar og rangar ásakanir FBI kyntu undir þúsundum greina með fullyrðingum um að ég sýni blaðamönnum í tvo heimana og umgangist mafíuna. Þess háttar dylgjur hræða stóru kallana í kvikmyndaverunum og einnig sjálfstæða framleiðendur - og drepa starfsferla."

Seagal hefur aldrei verið ákærður og neitar öllum tengslum við nokkra glæpastarfsemi. Krefst hann þess að mannorð sitt verði hreinsað.