Tómatarnir látnir fljúga

Um fjörutíu þúsund manns söfnuðust saman í bænum Buñol á austurströnd Spánar til að taka þátt í hinum árlega tómataslag eða Tomatina hátíðinni. Á hádegi var farið með fimm vörubílshlöss eða um 115 tonn af tómötum inn á aðaltorg bæjarins og létu þátttakendur tómatana dynja hver á öðrum.

Tomatina hátíðin hefur verið haldin frá því 1945 er reiðir þátttakendur í árlegri kjötkveðjuhátíð skiptust á fljúgandi tómötum og það þótti góð hugmynd að áframhaldandi skemmtun.

Nú koma ferðamenn víða að til að taka þátt í hátíðinni og bæjaryfirvöld sjá þátttakendum fyrir um 500 sturtum en einnig er boðið upp á nærliggjandi á til að skola tómatgumsið af sér að skemmtun lokinni.