Skeggprúðir keppa

Margir Skeggprúðustu karlmenn heims komu um helgina saman í Brighton á Englandi og kepptu í skeggvexti og hirðu. Keppt var í ýmsum flokkum, svo sem alskeggs- og yfirskeggsflokki, Daliflokki, hökuskeggsflokki og einnig er keppt í opnum flokki þar sem skeggin eru slík listaverk að erfitt er að flokka þau.

Markmið keppninnar er að heiðra vöxt, hönnun og sýningu andlitshárs og einnig að gleðja fólk.

Breska ríkisútvarpið BBC hafði eftir Steve Parsons, sem skipulagði keppnina, að sumir keppendur legðu mikið á sig við að hirða um skegg sitt. Keppnin í opna flokknum væri skemmtilegust því þar væri allt leyfilegt. Í síðustu keppni, sem fór fram í Berlín fyrir tveimur árum, hafði einn keppandinn mótað Brandenborgarhliðið í skegg sitt með hestum og fánum og öllu tilheyrandi.

Næsta keppni verður haldin í Anchorage í Alaska.