Klappað þar til ljósin voru kveikt

Veðramót er ein besta mynd íslenskrar kvikmyndasögu miðað við dóm Sæbjarnar Valdimarssonar í Morgunblaðinu í dag. Áhorfendur á frumsýningunni í Háskólabíói virtust á sama máli en þeir klöppuðu allan þann tíma sem kreditlistinn rann upp tjaldið í lok myndarinnar.

Sæbjörn segir, að Veðramót sé ánægjuleg upplifun því vel sé farið með viðkvæmt efnið, gætt hófsemi og smekkvísi sem geri myndina að heilsteyptu verki og frábærri afþreyingu sem hitti áhorfandann í hjartastað.

„Hún raðar sér umsvifalaust í þröngan hóp bestu mynda okkar stuttu kvikmyndasögu. Tæknivinna er góð og tónlistin, bæði frumsamin og gamla hippamúsíkin sem svífur yfir vötnunum, á ríkan þátt í að skapa rétta andrúmið. Kvikmyndatakan er framúrskarandi, hrikaleg fegurð eyðibyggðarinnar undir Jökli er gerð að vel viðeigandi ramma utan um magnþrungið efnið. Leikurinn er enn ein rósin í hnappagat Veðramóta, nánast hvergi veikan punkt að finna," segir m.a. í umsögn Sæbjörns.

Nánar er fjallað um myndina í Morgunblaðinu í dag.