Þúsundir syrgja Pavarotti í Modena

Vinir og ættingjar óperusöngvarans Luciano Pavarotti eru samankomnir við útför hans sem fer fram í dómkirkjunni í Modena á Norður-Ítalíu, sem er heimabær söngvarans.

Þúsundir eru viðstaddir útförina, en þeirra á meðal má nefna Bono, sem er söngvari írsku rokksveitarinnar U2, og óperusöngvarana Placido Domingo og Jose Carreras.

Athöfnin náði hámarki þegar leikin var upptaka með Pavarotti þar sem hann söng Nessun Dorma og ítalski flugherinn flaug yfir kirkjuna.

Pavarotti lést sl. fimmtudag eftir að hafa háð langa baráttu við krabbamein. Hann var 71s árs að aldri.

Hann verður jarðsettur við einkaathöfn í kirkjugarði þar sem ættingjar hans hafa verið bornir til hinstu hvílu. Þeirra á meðal eru foreldrar hans og sonur hans sem fæddist andvana.