Jessica Simpson hyggur á barneignir

Fregnir herma að Jessica Simpson ætli að eignast barn með hárgreiðslumeistaranum sínum, sem er samkynhneigður. Hún ætlar í tæknifrjóvgun, og hárgreiðslumeistarinn hennar og góður vinur, Ken Paves, vill verða faðirinn.

Jessica er ógift og ekki í sambúð, en hefur að undanförnu ekki farið í launkofa með löngun sína til barneigna. Hún hefur íhugað ættleiðingu, en haft er eftir heimildamanni að hana langi til að „upplifa meðgöngu,“ því að hún sé „stúlka af gamla skólanum.“

Ken langi mikið til að eignast barn, en kærastinn hans sé ekki of ákafur til þess. Jessica hafi stungið upp á því við Ken að þau notuðu tæknifrjóvgun, og hann hafi samþykkt það. Ætli þau að hefja „ferlið“ á næstu mánuðum.

Jessica er 27 ára. Í fyrra skildi hún við Nick Lachey, en hefur að undanförnu verið orðuð við söngvarann John Mayer. Aftur á móti eru á kreiki sögusagnir um að hann sé á föstu með Cameron Diaz.

• 1 blogg um fréttina

Bloggað um fréttina

• Gísli Foster Hjartarson: 3 ungar stúlkur í Eyjum hyggja á barneignir