Bílabíó í kvöld

Boðið verður upp á bílabíó á Alþjóðlegri kvikmyndahátíð í Reykjavík í kvöld í flugskýli 885 á varnarsvæðinu við Keflavíkurflugvöll. Kvikmyndin American Graffiti verður sýnd.

Með því að sýna myndina í flugskýlinu er nær tryggt að sýningin geti farið fram þótt veður verði válynd. Flatarmál skemmunnar er slíkt að 1500 bílar rúmast auðveldlega þar innandyra – enda er skýlið stærsta bygging landsins.

Kvikmyndin American Graffiti (1973) eftir George Lucas gerist árið 1962 og segir af fjórum vinum sem ákveða að rúnta um bæinn og njóta lífsins til fulls síðasta kvöld sumarsins – síðasta kvöldið áður en þeir halda hver í sína áttina í háskóla.

Aðgangseyrir í bílabíóið er 1000 krónur á bíl. Miðasala stendur yfir á www.midi.is og í upplýsingamiðstöð hátíðarinnar á Hressó.