Sigur Rós á sigurbraut

Hljómsveitin Sigur Rós hlaut í gær nýbreytniverðlaun breska tónlistartímaritsins Q, en verðlaunin voru afhent við hátíðlega athöfn í Lundúnum. Verðlaun voru veitt í fjölmörgum flokkum og fékk Sigur Rós verðlaun fyrir það sem á ensku kallast "innovation in sound". "Ég skil þetta eiginlega ekki sjálfur, en þýðir "innovation" ekki að vera framsækinn eða að gera eitthvað nýtt?" segir Orri Páll Dýrason, trommuleikari Sigur Rósar, um verðlaunin. Hann segir þetta vissulega mikinn heiður. "Þetta virkar þó ekki beint eins og hvatning, heldur meira svona eins og bónus," segir hann, en það var The Edge, gítarleikari írsku hljómsveitarinnar U2, sem hlaut verðlaunin í fyrra.

Á meðal annarra flytjenda sem fengu verðlaun á hátíðinni voru Kylie Minogue, Damon Albarn, Ian Brown, Muse, Amy Winehouse og Paul McCartney, en sá síðastnefndi fékk sérstök heiðursverðlaun. Bítillinn fyrrverandi kynnti sig formlega fyrir meðlimum Sigur Rósar, en ekki vildi betur til en svo að Orri missti af kappanum. "Ég var því miður bara úti að reykja þegar hann kom og kynnti sig," segir hann og hlær.