Hvað heitir Rambó?

Ekki einu sinni sjálfur Sylvester Stallone virðist vita hvað fjórða Rambó-myndin mun koma til með að heita, svo ört berast fréttir af breyttu nafni myndarinnar. Fyrst hét hún In the Serpent's Eye, næst Pearl of the Cobra og loks Moon Unit Rambo þangað til nafninu var breytt í John Rambo, sem var nafnið þangað til í gær þegar myndin var nefnd Rambo: To Hell and Back.

En Stallone er svo sannarlega með puttann á púlsinum hvað varðar heimsfréttirnar því í fjórðu myndinni bregður Rambó sér til Búrma, já, eða Myanmar – líklega er ekki nema von að erfitt sé að finna heiti á myndina rétt eins og landið sem hún gerist í.