Verkfall yfirvofandi í Hollywood vegna launadeilu handritshöfunda

Kvikmynda- og sjónvarpsiðnaðurinn í Hollywood stendur frammi fyrir neyðarástandi því stéttarfélag handritshöfunda í draumaborginni tilkynnti í dag að höfundarnir muni hefja verkfall nk. mánudag um óákveðinn tíma.

Alls munu 12.000 meðlimir Writers Guild of America láta niður störf á mánudagsmorgun nema að samkomulag náist við framleiðendur, en deilan snýst um launakröfur og hagnaðarhlutdeild.

Handritshöfundarnir krefjast þess að hlutur þeirra í sjónvarpsþáttum sem eru seldir á DVD-diskum verði aukinn auk þess sem að greiðslufyrirkomulag vegna þátta sem eru sýndir á netinu, í farsímum og öðrum nýjum sviðum fjölmiðlunar verði bætt.

Sérfræðingar í Hollywood telja að ef verkfallið muni vara í nokkra mánuði þá megi búast við því að iðnaðurinn tapi rúmum milljarði Bandaríkjadala.

Á forsíðu kvikmyndatímaritsins Variety í dag, sem hefur verið kölluð biblía kvikmyndaiðnaðarins, mátti lesa fyrirsögnina „Apocalypse Now“, þar sem vísað er í fræga kvikmynd Francis Ford Coppola.

Þá er talið að ákvörðun handritshöfundanna muni leiða til keðjuverkunar innan kvikmyndaiðnaðarins.

• 2 blogg um fréttina

Bloggað um fréttina

• Ómar Ingi: Þetta var tímaspursmál
• Gísli Foster Hjartarson: Ég segi nú bara....