Besta tónleikamynd síðari ára

Bíóspekúlantar á breska kvikmyndatímaritinu Total Film, sem ásamt Empire er það stærsta þar í landi, halda ekki vatni yfir Heima þeirra Sigur Rósar og segja hana bestu tónleikamynd sem komið hafi út á meðan blaðið hafi starfað. Blaðið hélt nýlega upp á tíu ára afmælið og Heima er því að þeirra dómi besta tónleikamyndin sem gerð hefur verið síðan árið 1997, ef ekki fyrr.

Þeir segja ómögulegt að horfa á myndina og vilja ekki heimsækja Ísland í kjölfarið og koma með þá tillögu að einhverjir stórhuga kvikmyndagerðamenn búi til vestra á Íslandi sem allra fyrst, landslagið sé fullkomið fyrir slíkt.

Annars staðar í blaðinu segir Jonathan Dean að tónlist Sigur Rósar hljómi eins og tónlistin sem Guð almáttugur myndi semja ef hann væri til. Þeir Total Film-menn urðu þó fyrir nokkrum vonbrigðum þegar þeir hringdu í Georg Hólm, bassaleikara sveitarinnar, og hann var upptekinn við að kaupa prenthylki. Það þótti þeim varla iðja fyrir staðgengla almættisins og líktu vonbrigðunum við að þeir myndu hringja í Angelinu Jolie á meðan hún væri að klippa táneglurnar.