Magnús sækir um stöðu leikhússtjóra Borgarleikhússins

Magnús Geir Þórðarson, leikhússtjóri Leikfélags Akureyrar, tilkynnti starfsfólki LA í gær, skv. heimildum Morgunblaðsins, að hann sækti um stöðu leikhússtjóra Borgarleikhússins. Starfið var auglýst í gær, umsóknum þarf að skila fyrir 29. desember og nýr leikhússtjóri tekur til starfa á vordögum. Guðjón Pedersen, núverandi leikhússtjóri Borgarleikhússins, hættir í vor eftir átta ár í starfi en venja er að nýr leikhússtjóri vinni við hlið þess fráfarandi um skeið.

Magnús Geir hefur stýrt LA í tæp fjögur ár, félagið hefur átt mikilli velgengni að fagna á þeim tíma og aðsókn á sýningar þess margfaldast.