Moss enn í dópinu

Breska fyrirsætan Kate Moss olli vinum sínum miklum vonbrigðum þegar hún grátbað um eiturlyf í afmælisveislu um síðustu helgi. Moss var í þrítugsafmæli leikonunnar Daviniu Taylor ásamt vinkonum sínum, þeim Siennu Miller, Naomi Campbell og Kelly Osbourne, og kom þeim og öðrum viðstöddum í opna skjöldu þegar hún bað plötusnúðinn Elliot Eastwick um ýmis eiturlyf, meðal annars kókaín og kannabisefni.

„Það var alveg greinilegt að hún var á einhverju,“ sagði Eastwick í samtali við dagblaðið Daily Mirror. „Hún vildi bara dansa og skipaði mér að skipta um tónlist. Ég sá líka að einhver í hennar hópi dró fram jónur og fór að reykja. Svo fékk Kate einhverjar pillur, og tók þær síðar um kvöldið.“

Moss hefur barist við fíkniefnadjöfulinn um nokkurt skeið, ásamt fyrrverandi unnusta sínum, hinum skrautlega Pete Doherty.