Neita að kalla Kidman mömmu

Kvikmyndaleikkonan Nicole Kidman hefur greint frá því að tvö ættleidd börn hennar og Tom Cruise neiti að kalla hana mömmu. Þá segist hún verða að sætta sig við að þau alist upp innan Vísindakirkjunnar þar sem þau búi hjá föður sínum. 

„Krakkarnir mínir kalla mig ekki mömmu,” sagði hún í viðtali sem sýnt var á bresku sjónvarpsstöðinni GMTV. Þau kalla mig Nicole en mér mislíkar það og ég skamma þau fyrir það," segir hún. Þá sagði hún börnin alin upp innan Vísindakirkjunnar og að hún vilji ekki ræða það frekar.

Spurð um það hvers vegna börnin búi hjá föður sínum og eiginkonu hans Katie Holmes sagði hún að þau vera orðin það stór að þau réðu því að mestu sjálf. Los Angeles hafi mikið aðdráttarafl og sjálf stefni hún að því að eignast þar heimili til að geta verið meira með þeim. „Líf dóttur minnar og sonar eru mótuð af lífi mínu. Hefði ég ekki verið reiðubúin til að taka á mig þá ábyrgð hefði ég ekki átt að ættleiða þau,” sagði hún. „Það má líka færa rök fyrir því að ég hefði ekki átt að skilja og það er á vissan hátt rétt en stundum fær maður ekki að ráða hlutunum. Fólk hættir að elska hvert annað, það gerir það.”