Britney að kikna undan streitu

Bandaríska söngkonan Britney Spears mætti ekki er forræðisdeila hennar og fyrrum eiginmanns hennar Kevin Federline var tekin  fyrir hjá dómara. Mark Vincent Kaplan, lögmaður Federline, segir hana hafa borið við kvíða og streitu en til hafði staðið að hún svaraði spurningum lögfræðinga Federline. 

„Ég var látinn vita að Britney Spears teldi sig ekki geta mætt af heilsufarsástæðum,” sagði Kaplan. „Hún á eftir að mæta síðar en ég útiloka ekki að við munum fara fram á ákveðinn sveigjanleika af hálfu réttarins á þeirri forsendu að hún hafi ekki mætt til formlegrar fyrirtöku málsins.” 

Sam Lufti, vinur og aðstoðarmaður Spears, segir umfjöllun um forræðisdeiluna, hafa valdið henni mikilli streitu. „Hún er bæði líkamlega veik og þjáist af mikilli streitu. Það eru milljónir manna að fylgjast með henni. Það er henni einfaldlega ofviða," segir hann.

Federline fer nú með forræði sona þeirra Sean Preston, tveggja ára, og Jayden James, fimmtán mánaða og fær hann 15.000 Bandaríkjadollara á mánuði frá henni í meðlög á mánuði.