Stjörnupar í hnapphelduna

Sú saga gengur nú fjöllum hærra að ofur-stjörnuparið Beyoncé Knowles og Jay-Z sé gengið í hnapphelduna. Eftir því sem næst verður komist fór athöfnin fram í París í Frakklandi en í stað hefðbundinna giftingarhringa létu hjónin húðflúra persónuleg tákn á baugfingur.

Haft er eftir heimildarmanni að athöfnin hafi verið á afar lágstemmdum nótum enda ekki oft sem þau Beyoncé og Jay-Z fá tækifæri til að njóta hljóðlátra samverustunda.

„Þau vildu umfram allt hafa litla og hljóðláta athöfn og þeim fannst húðflúrin vera góð hugmynd,“ sagði sá hinn sami. Áður hafði sú saga komist á kreik að Jay-Z hefði beðið um hönd Beyoncé í fríi sem parið tók sér í Cannes í lok maí á þessu ári. Í kjölfarið var haft eftir Beyoncé, sem er 26 ára gömul, að hún óskaði sér að geta einn daginn gifst og eignast þrjú börn, tvo pilta og eina stúlku.

Fyrr í þessum mánuði fögnuðu hjónakornin 38 ára afmæli Jay-Z með því að sækja erótíska kabarettsýningu í Parísarklúbbnum Le Crazy Horse Paris. Samband Jay-Z og Beyoncé hófst árið 2002 þegar þau unnu saman að laginu „'03 Bonnie and Clyde“.