Dýrasti bjór í heimi

Í auglýsingum um Carlsberg bjór segir að það sé sennilega besti bjór í heimi. Enginn vafi leikur hins vegar á því, að ný bjórtegund fyrirtækisins, Vintage No. 1, er dýrasti bjór í heimi.

Hver flaska af þessum bjór kostar 2008 danskar krónur, sem samsvarar um 25.790 íslenskum krónum auk nokkurra aura.  Að sögn Jens Eiken, bruggara hjá  Carlsberg ASA, voru aðeins framleiddar 600 37,5 sentílítra flöskur af þessum bjór og flestar þeirra verða til sölu á þremur af fínustu veitingahúsunum í Kaupmannahöfn. Þegar hafa 52 flöskur selst.

„Við teljum að til sé fólk, sem vilji greiða þetta verð fyrir að smakka ótrúlega góðan bjór eða geyma hann á arinhillunni," sagði Eiken.

Hann sagði, að leyndarmálið á bak við framleiðsluna væri m.a. að bjórinn, sem 10,5% að styrkleika, er geymdur í sænskum og frönskum sérsmíðuðum eikartunnum í myrkri hvelfingu, 15 metrum undir elsta brugghúsi fyrirtækisins. Segir sérfræðingurinn, að bragðið af bjórnum minni á sveskjur, karamellu, vanillu, eik og kirsuberjapúrtvín og best sé að drekka hann með góðum blámygluosti og í félagsskap náins vinar.

Á hvern flöskumiða er að auki stimplað grafíklistaverk eftir danska listamanninn  Frans Kannike. Segir Eiken, að vegna þessa sé hægt að selja glerið fyrir 500 danskar krónur. 

Flöskumiðarnir eru listaverk eftir Frans Kannike. AP

• 4 blogg um fréttina

Bloggað um fréttina

• Hvíti Riddarinn: Hvað er vandamálið?
• Ólafur Björnsson: Bjór er góður
• G. Tómas Gunnarsson: Lúxusvörur og launajöfnuður
• Heiðar Birnir: Fullt af Íslendingum í Köben