Kynþokkafyllsti fótboltakappinn

Það kemur líklega ekki á óvart að David Beckham hefur verið kosinn kynþokkafyllsti fótboltakappi í heimi. Vefsíðan www.thepeoplesclub.com stóð fyrir valinu og voru það breskir kvenkyns fótboltaaðdáendur sem kusu.

„Beckham hefur ekki misst kynþokkann, hann er dáður fyrir útlit sitt og boltahæfileika, þrátt fyrir að hafa flutt til Los Angeles,“ sagði eigandi vefsíðunnar um niðurstöðuna sem hann segir einnig sýna að breskar konur horfi ekki aðeins á breska fótboltamenn því þeir sem á topp-tíu-listanum sitji komi víða að.

David er ekki sá eini í Beckham-fjölskyldunni sem fær þann heiður að vera kynþokkafyllstur því Victoria var nýlega valin kynþokkafyllsta móðir í heimi af undirfatamerkinu Victoria Secret.