Silvía Nótt breytist í stælta karlmenn

Það verður ekki annað sagt en að söngatriði vöðvabúntanna í Mercedes Club sé farið að líkjast allverulega atriði Silvíu Nætur um árið. Gilzenegger og félagar fara um víðan völl með stórar yfirlýsingar um eigið ágæti á tónlistarsviðinu og dugir þá ekkert minna en að vitna til tónvísi forfeðranna.

Það getur þó varla talist frumlegt að apa eftir Silvíu sem apaði eftir Johnny Naz sem apaði eftir Ali G og af þögn Barða Jóhannssonar sem samdi þetta annars stórskemmtilega lag, má skilja að hann hafi lítinn áhuga á að taka þátt í leikritinu.

 Hitt er svo annað mál að atriðin sjálf vega þungt þegar sigurlagið er valið af áhorfendum og því þarf ekki síður að huga að sjónræna þættinum. Sem þýðir svo aftur að Gilzenegger þarf helst að fá aðra kennslustund hjá Valda í Jeff Who? í því hvernig best er að þykjast spila á hljómborð.