Rufus Wainwright vill slökkva ljósin

Tónlistarmaðurinn Rufus Wainwright hefur hrint af stað herferð  þar sem hann biður aðdáendur sína jafnt sem aðra um að slökkva öll ljós í tólf klukkustundir frá hádegi til miðnættis þann 21 júní nk.

Wainwright, sem er á langri hljómleikaferð um þessar mundir, hyggst halda órafmagnaða tónleika í New York þann 19. mars nk. þar sem hann hyggst safna fé til verkefnisins. Rufus Wainwright heldur tónleika í Háskólabíói 13. apríl næstkomandi.

Framtakið hefur fengið titilinn Blackout Sabbath, myrkvaður hvíldardagur, en vísar auðvitað í nafn þungarokkshljómsveitarinnar Black Sabbath, sem Ozzy Osbourne stýrði á sínum tíma.

Söngvarinn fékk innblástur frá rafmagnsleysinu í New York árið 2003, þegar rafmagn fór af tugum borga á austurströnd Bandaríkjanna,  en Rufus lýsir því sem mögnuðu kvöldi.

Vill Wainwright að fólk láti rafmagnið eiga sig þennan dag þann 19. júní en  hugsi þess í stað um það hvað það geti gert fyrir umhverfið.

 Á bloggi tónlistarmannsins kemur fram að móðir hans hafi auk þess bent á að dagurinn sé auk þess tilvalinn til að afþíða ísskápinn.

• 1 blogg um fréttina

Bloggað um fréttina

• Ragnheiður : Hann er að tala um 21 júní