Kalkúnn fulltrúi Íra á Eurovision

Írum hefur ekki gengið sem best í undanförnum Eurovision-keppnum eftir nánast óslitna sigurgöngu á síðasta áratug 20. aldar.  Þeir hafa nú gripið til sinna ráða og senda kalkúninn Dustin til Belgrad í maí en Dustin vann yfirburðasigur í írsku lokakeppninni í gærkvöldi.

Lagið, sem Dustin flytur í Belgrad heitir Irelande Douze Pointe en þar er gert grín að atkvæðagreiðslunni í Eurovision keppninni og landfræðilegum atkvæðahalla.

Hristu fjaðrirnar og brýndu gogginn
hristu þær til vesturs og austurs

söng Dustin í tónlistarhúsinu í Limerick í gærkvöldi.

Veifaðu evru-höndum og evru-fótum
veifaðu þeim í kalkúnataktinum

Dustin mun taka þátt í fyrri undankeppninni í Belgrad 20. maí en íslenska Eurobandið mun taka þátt í þeirri síðari, 22. maí. Lokakeppnin fer fram 24. maí. 

Kalkúnninn Dustin er þekkt sjónvarpspersóna á Írlandi og kom fyrst fram árið 1990 ásamt leikbrúðunum Zig og Zag í skemmtiþætti írska sjónvarpsins. Vinsældir hans uxu hratt og hann fékk fljótlega eigin sjónvarpsþátt: Fréttir Dustins.  Hann hefur mikinn áhuga á stjórnmálum og nafn hans hefur jafnvel birst á kjörseðlum kjósenda, sem vilja mótmæla stjórnmálamönnum með táknrænum hætti.

Dustin er einnig vinsæll tónlistarkalkúnn og hefur gefið út 14 smáskífur og 6 breiðskífur á ferlinum. Á þeirri síðustu, sem kom út árið 2005, söng hann m.a. tvísöng með  Chris De Burgh. 

• 4 blogg um fréttina

Bloggað um fréttina

• Snorri Bergz: Væri ekki gott að fá svona borgarstjóra?
• Þórhildur Daðadóttir: Kalkúnn í Eurovision
• María Anna P Kristjánsdóttir: Flott framlag Íra, og mjög gott framlag Íslendinga.
• Jac Norðquist: Sko ef þetta er......