Alþjóðleg hundasýning í reiðhöll Fáks

Þýskur fjárhundur var valinn besti hundur sýningar í október. Hann er á myndinni ásamt sænska dómaranum Kenneth Edh, Gunnlaugi Valtýssyni, Elínu Þóru Eiríksdóttur, Hjördísi H. Ágústsdóttur, sem sýndi hann til sigurs, og Jónu Th. Viðarsdóttur, formanni HRFÍ.

Skráningar á alþjóðlega haustsýningu Hundaræktarfélags Íslands hafa sjaldan verið fleiri en helgina 1.-2. mars mæta um 800 hreinræktaðir hundar af 83 hundakynjum í dóm. Sýningar félagsins hafa stækkað ár frá ári sem endurspeglar mikinn áhuga Íslendinga á hundum og hreinræktun þeirra en einn megintilgangur hundasýninga er að meta hundana út frá ræktunarmarkmiði hvers kyns og leiðbeina ræktendum þannig í starfi sínu.

Sýningin verður haldin í Reiðhöllinni í Víðidal og hefjast dómar kl. níu árdegis báða daga og standa fram eftir degi. Dómarar frá Svíþjóð, Ítalíu, Slóveníu, Noregi og Bandaríkjunum dæma í fimm sýningarhringjum samtímis. Úrslit á sunnudegi hefjast milli 15 og 16 og kemur þá í ljós hvaða hundar bera af að mati dómara.

Í fréttatilkynningu kemur fram að í anddyri reiðhallarinnar verði kynningarbásar um ólík hundakyn. Þar gefst gestum og gangandi kostur á að kynnast hundum og ræða við hundeigendur auk þess sem á staðnum verður fjöldinn allur af sölu- og kynningarbásum þar sem ýmis tilboð verða í gangi.