Mike Smith látinn

Mike Smith, söngari hljómsveitarinnar Dave Clark Five, lést í fyrradag úr lungnabólgu, 64 ára gamall. Tvær vikur eru þar til sveitin verður tekin í heiðurssamfélagið US Rock and Roll Hall of Fame. Smith dó á spítala fyrir utan Lundúnaborg en hann var lagður inn á miðvikudag með sýkingu.

Lasleikann er hægt að rekja til meiðsla sem söngvarinn varð fyrir er hann féll af grindverki árið 2003 og lamaðist neðan brjóstkassa. „Síðustu fimm ár hafa verið erfið fyrir Mike. Ég er döpur að missa hann en fegin að vita að hann gat eytt síðustu mánuðunum heima hjá sinni ástkæru eiginkonu Charlie,“ sagði Margot Lewis, umboðsmaður hans.

Dave Clark Five var mikilvæg hljómsveit í bresku tónlistarsenunni á sjöunda áratugnum. Hún var ein af samkeppnissveitum Bítlanna og átti smelli beggja vegna Atlantshafsins. 

• 1 blogg um fréttina

Bloggað um fréttina

• Hvíti Riddarinn: Glad all over...