Brooklyn breikaði í eigin afmælisveislu

Elsti sonur Beckham-hjónanna, Brooklyn, hélt upp á níu ára afmælið sitt með pompi og prakt síðastliðinn þriðjudag og var afmælisveislan haldin á mexíkóskum veitingastað í Los Angeles. Eins og við var að búast var ekki þverfótað fyrir frægu fólki í veislunni og á meðal þeirra sem heiðruðu pollann með nærveru sinni voru fyrirsætan Heidi Klum, leikkonan Eva Longoria Parker auk fjölda eiginkvenna liðsmanna Beckhams í Los Angeles Galaxy. David Beckam gat þó ekki verið viðstaddur þar sem hann er nú staddur á keppnisferðalagi með liði sínu í Kína.

Veislan þótti takast mjög vel og til gamans má geta að mikil fagnaðarlæti brutust út þegar afmælisbarnið og vinir hans stigu fram á gólfið og sýndu flotta breikdans-takta. Veislan var haldin á afmörkuðu svæði inni á veitingastaðnum og stóðu átta öryggisverðir vörð um gestina.