Flugtími endaði í klósettinu

Harrison Ford sannaði það fyrir leikaranum Shia LaBeouf að ungum er ekki allt auðið.

Sagan segir að LaBeouf sem leikur með Ford í nýjustu Indiana Jones-myndinni Indiana Jones and the Kingdom of the Crystal Skull hafi suðað viðstöðulaust í Ford um að hann tæki sig með í þyrluflug að loknum tökum á myndinni en Ford er mikill flugáhugamaður og flýgur m.a. þyrlu.

Að lokum á Ford að hafa látið undan og boðað LaBeouf á flugvöllinn í Burbank í Kaliforníu. Á loft hófust þeir félagar í þyrlu Fords og síðan ekki söguna meir, eða allt þar til að þyrlan lenti því þá skaust LaBeouf út eins og eldibrandur og beinustu leið inn á klósett.

Ford mun hafa verið mjög skemmt yfir skyndilegri magakveisu LaBeoufs og þegar leikarinn ungi sneri aftur úr klósettferðinni mun Ford hafa spurt hann sakleysislega: „Jæja, hvenær eigum við svo að fara aðra ferð?“