Íslendingar fúlsa við meistaraverki

Tónleikar þar sem meistaraverk Bítlanna, Sgt. Pepper's Lonely Hearts Club Band verður flutt í heild sinni, hafa verið færðir í Háskólabíó. Upphaflega stóð til að halda tónleikana í Laugardalshöll, en ekki tókst að selja eins marga miða í forsölu og reiknað hafði verið með og því var brugðið á það ráð að færa tónleikana í Háskólabíó.

Án þess að menn vilji lesa of mikið í miðasöluna þykir ljóst að ekki sé það skortur á vinsældum Bítlanna sem liggur að baki dræmri miðasölu, en hvað þá? Þá má einnig velta því fyrir sér að ef Bítlarnir trekkja ekki að hvernig skyldi miðasalan ganga á Eagles heiðrunartónleikana í næstu viku? Þar kostar miðinn litlar 5.900 krónur.