Sheen í nýrri hryllingsmynd

Glaumgosinn og leikarinn Charlie Sheen hefur samþykkt að taka að sér aðalhlutverkið í ónefndri hryllingsmynd kvikmyndafyrirtækisins Twisted Pictures. Í myndinni mun Sheen bregða sér í hlutverk ósköp venjulegs heimilisföður sem lendir í þeim skelfingaraðstæðum að missa fimm ára gamlan son sinn í hendur morðóðs barnaníðings.

Eftir að bandaríska dómskerfið bregst heimilisföðurnum og unnustu hans ákveða skötuhjúin að grípa til sinna eigin ráða, að vekja upp skrímslið sem býr innra með þeim og sjá til þess að barnaníðingurinn fái þau endalok sem hann á skilið.

Ekkert hefur verið tilkynnt um hvaða aðrir leikarar muni koma til með að hreppa hlutverk í myndinni en þó er vitað að Rob Lieberman mun leikstýra myndinni, en hann hefur gert myndir á borð við Fire in the Sky, og handritið kemur frá lítt þekktum handritshöfundi að nafni Marek Posival.

Miðað við fyrri myndir Twisted Pictures er líklegt að hér sé afar ofbeldisfull kvikmynd á ferðinni en fyrirtækið er fyrst og fremst þekkt fyrir að framleiða hinar gífurlega ofbeldisfullu og blóðugu Saw-myndir.

• 1 blogg um fréttina

Bloggað um fréttina

• Snorri Bergz: Charlie Sheen í nýrri hryllingsmynd