Dýr brúnkumeðferð

Bandaríska leikkonan Lindsay Lohan er sögð hafa eytt um 70 þúsund dollurum, sem nemur um fimm milljónum króna, í brúnkumeðferðir af ýmsu tagi á stuttum tíma. Lohan forðast að stunda sólböð þar sem hún hefur mjög viðkvæma húð, en hún hefur nú auknar áhyggjur af þeim gífurlegu upphæðum sem hún hefur varið í að fá lit í húðina.

„Lindsay þarf að átta sig á því hvað er að gerast, því hún fær ekki sömu tilboð og hér áður fyrr. En hún veit vel að hún þarf að slá í gegn í eins og einni mynd til þess eins að geta lifað hinu þægilega lífi að nýju,“ sagði vinkona hennar í viðtali.

Leikkonan unga hefur eytt peningum í fleira en brúnkumeðferðir að undanförnu, en á stuttum tíma hefur hún eytt einni milljón dollara á hótelum, auk 315.000 dollara sem hún hefur borgað fyrir meðferðir við áfengissýki. Leikkonan mun ekki eiga mikla peninga eftir, en síðustu tvær myndir hennar, I Know Who Killed Me og Georgia Rule fengu báðar slæma aðsókn í kvikmyndahúsum.