Nýja Bond-myndin frumsýnd í október

Nýjasta kvikmyndin um James Bond, Quantum of Solace, verður frumsýnd fyrr en áætlað var eða 31. október. Framleiðendur myndarinnar greindu frá þessu í liðinni viku en myndin er sú 22. um njósnara hennar hátignar og önnur myndin með Daniel Craig í hlutverki naglans.

Fyrri frumsýningardagur var 7. nóvember en nú hefur frumsýningu verið flýtt um viku. Þetta hljóta að vera gleðifréttir fyrir Bond-aðdáendur og spurning hvort frumsýning myndarinnar hér á landi verður fyrr en ætlað var einnig. Handrit myndarinnar er unnið upp úr smásögu Ians Flemings sem ber sama nafn og myndin.

Tökum á myndinni er lokið í Panama og Bandaríkjunum en tökur hófust í janúar sl. Einnig verður tekið upp í Chile, Austurríki og á Ítalíu. Að þessu sinni leitar Bond mannsins sem bar ábyrgð á dauða unnustu hans í síðustu mynd.