100 myndir sýndar á 700IS

 700IS Hreindýraland, alþjóðleg og árleg kvikmynda- og myndbandsverkahátíð á Austurlandi, verður formlega sett á morgun.

Hátíðin stendur fram til 5. apríl. Í kringum hundrað myndir verða sýndar á hátíðinni í ár en mun fleiri bárust í keppnina. Listnemar frá Listaháskóla Íslands, Manchester Metropolitan-háskólanum og Tempe Arizona taka þátt í námskeiðum á vegum hátíðarinnar auk nemenda af listabraut Menntaskólans á Egilsstöðum, frá Verkmenntaskóla Austurlands og norskra nemenda úr kvikmyndaskóla í Vesteralen.

Hátíðin verður opnuð í Sláturhúsinu á Egilsstöðum kl. 20 á laugardagskvöld og hefst með ávarpi Ólafar Nordal alþingismanns. Opnuð verður sýning nöfnu hennar Ólafar Nordal myndlistarmanns, í samstarfi við Ásgerði Júníusdóttur óperusöngkonu og Þuríði Jónsdóttur tónskáld. Dagskráin færist svo yfir á Gistihúsið Egilsstöðum síðar um kvöldið. Hátíðin fer víða á næstu dögum og verður m.a. í Sláturhúsinu, á Skriðuklaustri, á Höfn í Hornafirði, á hreindýraslóðum á Jökuldal, á Eiðum og Café Valný á Egilsstöðum. 700IS er haldin í samstarfi við Menningarmiðstöð Fljótsdalshéraðs og styrkt af Fljótsdalshéraði, menningarráði Austurlands, Glitni og Alcoa Fjarðaráli.