Jared Leto í hjólastól

Jared Leto bætti á sig hátt í þrjátíu kílóum til þess að geta leikið Mark Chapman, morðingja Johns Len nons, í nýjustu mynd sinni Chapter 27. Líkami Leto þoldi illa aukakílóin og um tíma þurfti hann að notast við hjólastól til að komast leiðar sinnar vegna verkja í fótum.

Hinn 36 ára gamli Leto segist aldrei munu gera neitt slíkt aftur fyrir hlutverk því hann finni ennþá fyrir eftirköstunum. „Það tók mig um ár að finnast ég nokkurn veginn ég sjálfur aftur. Ég veit ekki hvort ég get nokkurn tíma komist í jafn gott form og ég var í áður.“

Uppátækið hafði þó sína kosti, að sögn leikarans. „Það var mikilvægt að ganga í gegnum þetta. Allt breyttist; hvernig ég gekk og talaði, hvernig mér leið með sjálfan mig og hvernig annað fólk kom fram við mig.“