Mariah Carey slær kónginum við

Í átjánda sinn hefur söngdísinni Maríu Carey tekist að komast á topp Billboard-smáskífulistans, með laginu „Touch My Body“.

Með þessu afreki slær María við sjálfum Elvis Presley og aðeins Bítlarnir geta státað af því að hafa átt betra gengi að fagna hjá Billboard, með 20 lög í efsta sæti.

En María virðist ekki ætla að láta árangurinn stíga sér til höfuðs og aðspurð sagðist hún ekki geta sett sig á stall með þeim listajöfrum sem umbyltu ekki aðeins tónlistinni heldur breyttu heiminum.

Lagið sem kom Maríu upp fyrir Elvis er fyrsta smáskífan af plötunni EMC2 sem koma á út 16. apríl. Platan er einskonar framhald af plötunni The Emancipation of Mimi sem kom út árið 2005 og var mest selda platan það árið.