Seldi Yoko myndir af Friðarsúlunni

Áhugaljósmyndarinn Jónas Björgvinsson er í miklu uppáhaldi sjálfrar bítlaekkjunnar Yoko Ono. Hefur hún keypt þrjár myndir af Jónasi, fyrir ótilgreinda upphæð, allar af Friðarsúlunni í Viðey.

„Þetta var nú hálfgerð tilviljun allt saman. Ég var að koma af sýningu í Laugarásbíó einhverntímann í september og sá að verið var að prufukeyra Friðarsúluna. Ég stökk heim til að ná í græjurnar og náði nokkrum fínum myndum sem ég setti síðan inn á flickr myndavefinn,“ segir Jónas sem grunaði ekki að myndirnar ættu eftir að snerta taugar Yoko Ono.

„Nokkru seinna fékk ég símtal frá SagaFilm sem kom að opnunarathöfninni í Viðey. Þeir komu mér í samband við Maguffin fyrirtækið, sem sér um friðarverkefnið hennar Yoko. Þeir höfðu milligöngu um kaupin á myndunum og ég hafði því aldrei beint samband við hana, nema eftir á, í rafrænum bréfaskrifum, þar sem hún þakkaði fyrir sig og annað slíkt,“ segir Jónas sem vill ekki gefa upp kaupverðið á myndunum. „Það eru engar risaupphæðir neitt. Þær eru alltént undir sex stafa tölu.“

Vildu öll sjá Sirkus

„Á sjálfu Friðarsúlukvöldinu var mér síðan boðið á opnunina. Síðar um kvöldið vildu Sean Lennon og hans fylgdarlið, sem innihélt meðal annars þekktan leikstjóra, Simon Hilton að nafni, sem hefur unnið mikið með Paul McCartney, endilega kíkja á Sirkus. Höfðu þau heyrt vel látið af staðnum og mundu vel eftir myndbandinu sem Björk tók þar á sínum tíma. Nokkru síðar þegar mótmæli niðurrifs Sirkus stóðu sem hæst, íhugaði ég nú að benda stjörnuliðinu á þetta óréttlæti en komst nú aldrei í það einhvern veginn. Spurning hvort það hefði breytt einhverju um örlög Sirkuss. Ég veit það ekki.“ Jónas vinnur sem tæknimaður hjá Nýherja en tekur myndir og býr til tónlist í frítímanum.

Á netinu flickr.com/jonasbj71

myspace.com/ummhm