Paris Hilton vill barn

Hótelerfinginn og samkvæmisljónynjan Paris Hilton á sér þá ósk heitasta að eignast barn. Hilton á um þessar mundir í ástarsambandi við Benji Madden, tvíburabróður Joels sem er unnusti og barnsfaðir vinkonu Hilton, Nicole Richie.

 Mun Hilton horfa öfundaraugum á fjölskyldu vinkonu sinnar og er nú staðráðin í að feta í fótspor Richie og eignast erfingja. Þessi plön Hilton hafa hins vegar fallið í grýttan jarðveg hjá Richie sem hefur sakað Hilton um að herma eftir sér í einu og öllu. Mun Richie hafa komist í mikið uppnám þegar Hilton hóf að hitta Benji og svo bætti það gráu ofan á svart þegar Hilton skellti sér með í tónleikaferð bræðranna á sama tíma og Richie beið heima með barnið.

 Segja vinir Richie að hún muni að öllum líkindum slíta vinskap sínum við Hilton ákveði sú síðarnefnda að eignast barn á næstu mánuðum. Já, það er vandlifað.