Barn og brjóstastækkun

Leikkonan Jennifer Aniston ætlar að fagna fertugsafmælinu sínu á næsta ári með því að láta stækka á sér brjóstin og ættleiða barn eftir því sem blaðið The National Enquirer heldur fram.

„Þetta er engin miðaldurskreppa,“ hefur blaðið eftir ónefndum vini leikkonunnar. „Þvert á móti. Hún er mjög ánægð með sjálfa sig og vill líkama sem endurspeglar það. Rassinn á henni er enn í fínu formi en henni finnst brjóstin þurfa smáfyllingu.“

Sami vinur segir Aniston líka vilja taka af skarið með barneignir á þessum tímamótum og hún stefni á að ættleiða barn. „Hún er búin að koma sér þannig fyrir í lífinu að hún getur veitt barni traust og gott heimili. Henni hefur aldrei liðið betur andlega og líkamlega og er tilbúin að takast á við móðurhlutverkið.“