Dansar fyrir þjóðhöfðingja

Íslenskur ballettdansari, Kári Freyr Björnsson, dansar í kvöld með norska Þjóðarballettinum á galasýningu í nýja óperuhúsinu í Ósló sem verður um leið tekið formlega í notkun. Þjóðhöfðingjar Norðurlandanna verða meðal áhorfenda, þ. á m. Ólafur Ragnar Grímsson, forseti Íslands, og forsetafrúin Dorrit Moussaieff.

Auk dansverka verða flutt lög úr ýmsum óperum sem og önnur tónlist og allt sýnt í beinni útsendingu í norska ríkissjónvarpinu, NRK.

Óperuhúsið hannaði arkitektastofan Snöhetta og þykir það afar fagurlega hannað og glæsilegt í alla staði og hefur m.a. verið líkt við óperuhúsið í Sydney.