Sátt við tölvubreytingar

Bandaríska leikkonan Kate Hudson segist fullkomlega sátt við að myndum af sér sé breytt með hjálp tölvutækninnar, en slíkt er iðulega gert áður en myndir eru birtar í glanstímaritum. Hudson er alveg sama þótt líkamshlutum hennar sé breytt með þessum hætti til þess að láta hana líta betur út. „Ég hef til dæmis margsinnis birst á síðum tímarita með blá augu. En ég er ekki með blá augu, ég er með græn augu. En mér er alveg sama, ef menn vilja breyta svona löguðu þá gera þeir það bara, það fer ekkert í taugarnar á mér,“ sagði Hudson í viðtali.

Í sama viðtali ræddi leikkonan fagra um móður sína, leikkonuna Goldie Hawn, og unnusta hennar, leikarann Kurt Russell, en þau hafa verið saman í 25 ár um þessar mundir. „Þeim líður báðum mjög vel. Þau fögnuðu 25 ára samveruafmæli sínu fyrir skömmu sem er frábært. Þau eru mjög hamingjusöm.“

Hudson, sem er 28 ára gömul, er dóttir Hawn og tónlistarmannsins Bill Hudson en hún lítur þó á Russell sem föður sinn.