Brigitte Bardot kærð fyrir kynþáttahatur

Franska kvikmyndastjarnan Brigitte Bardot kom fyrir rétt í gær í París vegna ákæru fyrir að ýta undir kynþáttahatur með ummælum um íslamstrú og fylgjendur hennar. Saksóknarar kröfðust þess að Bardot yrði dæmd í 2 mánaða skilorðsbundið fangelsi og til að greiða 15 þúsund evrur í sekt, jafnvirði 1,8 milljóna króna.

Bardot, sem er 73 ára, hætti að leika í kvikmyndum á áttunda áratug síðustu aldar og hefur síðan beitt sér mjög í dýraverndarmálum. En hún hefur einnig valdið deilum með ýmsum ummælum um múslima og innflytjendur frá múslimaríkjum. Hún hefur fjórum sinnum sætt opinberri ákæru vegna slíkra ummæla á síðasta áratug og verið dæmd til að greiða sektir á bilinu frá 1500 til  5000 evra. 

Anne de Fontette, saksóknari, sagði við réttarhaldið í gær, að hún krefðist harðari refsingar í þetta skipti og bætti við: „Ég er orðin heldur leið á að ákæra frú Bardot."

Kvikmyndaleikkonan var ekki viðstödd réttarhaldið og sagðist vera of veikburða til þess. 

• 4 blogg um fréttina

Bloggað um fréttina

• Einar Vignir Einarsson: Hún er elli ær kerlinginn. he he he
• hofy sig: Gitta skvísa.
• Gunnar Th. Gunnarsson: Brigitte Bardot - fölnað blóm
• Markús frá Djúpalæk: Hvað skyldi hún hafa sagt...