Getur ekki horft á Hringadróttinssögu

Leikkonan Uma Thurman getur ekki með nokkru móti horft á Hringadróttinsþríleikinn eftir að hún hafnaði boði um að leika í myndunum á sínum tíma.

„Mér var boðið hlutverk. Ég vildi að ég hefði tekið því. Ég var nýbúin að eignast dóttur mína á þessum tíma og gat ekki hugsað mér að fara frá henni í heilt ár. Ó, ég óska þess að ég hefði bara stokkið út í djúpu laugina en svo fór sem fór.“

Kvikmyndirnar um Hringadróttinssögu Tolkiens eru enn einhverjar tekjuhæstu kvikmyndir sögunnar og hlutu að lokum 17 óskarsverðlaun. Lord of the Rings: Return of the King (Hilmir snýr heim) er næsttekjuhæsta kvikmynd allra tíma og halaði inn um 566 milljónir punda eða um 85 milljarða króna.