Seinasti vetur Spaugstofu?

Karl Ágúst Úlfsson, forsprakki Spaugstofunnar, segir allar líkur á því að næsti vetur verði seinasti vetur Spaugstofunnar í Sjónvarpinu. Næsta vor verða 20 ár liðin frá því þeir Karl, Sigurður Sigurjónsson, Örn Árnason, Pálmi Gestsson og Randver Þorláksson hleyptu Spaugstofunni af stokkunum og hafa þættirnir notið gríðarlegra vinsælda allar götur síðan.

Karl segir í samtali við Morgunblaðið í dag að þeir félagar vilji loka „þessum 20 ára hring“ á næsta ári og snúa sér síðan að einhverju öðru. Þá telur hann ekki ósennilegt að þeir Spaugstofumenn hafi sett heimsmet með því að vera í svo mörg ár með gamanþátt í sjónvarpi skipaðan sömu leikurum og höfundum allan tímann, þó að Randver sé ekki lengur í hópnum.