Sigur Rós í Abbey Road

Fjórmenningarnir í Sigur Rós eru þessa dagana staddir í hinu fornfræga hljóðveri Abbey Road Studios í London ásamt upptökustjóranum Flood. Þar vinna þeir að upptökum á fimmtu breiðskífu sveitarinnar sem mun vera komin langt á leið. Þegar Morgunblaðið hafði samband við Orra Pál Dýrason, trommuleikara sveitarinnar, í gær stóðu yfir upptökur á strengjasveit og barnakór í Hljóðveri 1 en það mun vera sérhannað fyrir stórar hljómsveita- og kóraupptökur.

Það var hins vegar í Hljóðveri 2 sem Bítlarnir unnu á árunum 1962-1970. Orri segir að það hafi sannarlega verið áhrifaríkt að stíga þar inn fæti og snerta á sömu hljóðfærum og Bítlarnir notuðu við sínar tónsmíðar.