Margir skoðuðu eyfirsku söfnin

Þetta er annað árið í röð sem söfn við fjörðinn taka sig saman og halda Eyfirskan safnadag. Að þessu sinni var áhersla lögð á að kynna innri starfsemi þeirra - hvað þar færi fram þegar ekki væri opið. 

Fjöldi fólks þáði heimboð safnanna og margir nýttu sér ókeypis rútuferðir frá Akureyri á Smámunasafn Sverris Hermannssonar í Eyjafjarðarsveit og söfnin út með firði. Þá fór hópur fólks til Hríseyjar og skoðaði hús Hákarla-Jörundar og Holt - hús Öldu Halldórsdóttur.

Í dag gafst gestum meðal annars tækifæri á því að láta greina gersemar úr fórum sínum í Minjasafninu á Akureyri, á Byggðasafninu Hvoli á Dalvík var hægt að fylgjast með hvernig safnmunir eru skráðir og í Gamla bænum Laufási var kynning og sýnikennsla á torfhleðslu en torfbær krefst mikils viðhalds og þá gildir að hafa handverkið í lagi. Á Síldarminjasafni Íslands á Siglufirði unnu bátasmiðir að safnkostinum í Bátahúsinu, safn viðtala við iðnverkafólk var kynnt á Iðnaðarsafninu og á Safnasafninu á Svalbarðseyri var safnastefna þess einstaka safns kynnt.

• 3 blogg um fréttina

Bloggað um fréttina

• Hallgrímur Óli Helgason: "Hákarla-Jörundur"
• Níels A. Ársælsson.: O, jæja, hróin mín og hróin mín
• Brjánn Guðjónsson: Flott framtak